Get Adobe Flash player

La Lengo

L’enfluènci roumano en Gaulo coumenço au siècle dousen avans J.C. quouro se foundo la Provincia Romana que sa capitalo Narbonna devendra Narbonne. Lou mounde galo-rouman se fargo d’à cha pau e s’espandis après li counquisto de Jules Cesar à l’entour de 50 avans J.C. Lou latin es la lengo de l’escri e tambèn la di Rouman istant en Gaulo. Dóu rescountre d’aquéli emé li terradouren neissira uno lengo que li lenguisto dóu siècle vinten ié diran lou galo-rouman. Devers lou siècle vuechen, dous grand group dialeïti galo-rouman se counèisson, lou group di lengo d’oïl au Nord de la Gaulo e lou di lengo d’o au Sud. A l’entour de l’an Milo, li lengo d’o passaran dins l’escri, descasènt lou latin dins forço tèste ouficiau. En aqueste moumen parèis tambèn touto uno literaturo drudo e de qualita en lengo d’o : es la di troubadou. Au siècle dougen, li lengo d’o soun lengo literàri, juridico e amenistrativo, coustejon lou latin dins li tèste religious e scientifi. La grafìo e la gramatico soun asatado dóu latin.

Après la desfacho de Muret, en 1213, li rèi capecian espandisson l’enfluènci franceso sus tout lou sud de la Franço. Li tèste ouficiau van èstre desenant en francés o en latin. Li lengo d’o s’avalisson de l’escri mai soun toujour lou parla de la mita sud dóu reiaume de Franço. Faudra espèra lou mitan dóu siècle dès-e-nouven pèr que li dialèite de lengo d’o coumençon de s’avali de gràndi cièuta. Pèr li campagno e lou pople en generau, se parlo de  » patoues « .
Souto la tresenco republico, l’escolo obro pèr l’avalimen di parla prouvinciau e acò durara la majo part dóu siècle vinten. Lou coumbat pèr la subre-vivènço di lengo dicho « regiounalo » s’entameno pamens au siècle dès-e-nouven.
Istourian e escrivan di regioun de Franço aparon emé forço li parla de si terraire e tambèn si us e coustume. Es la grando epoco di fouclouristo que van, pèr un vertadié prefa de fournigo reculi pèr lou menut ço que faguè l’amo e la richesso di culturo de Franço desempièi de siècle e qu’èro en trin de s’escafa. Demié éli pouden cita Felix Arnaudin pèr li Lando e en Prouvènço Frederi Mistral.
Dins lou siècle vinten forço gens de letro, lenguisto, mèstre d’escolo van lucha pèr l’aparamen e l’ensignamen di lengo regiounalo. Vuei en Prouvènço, la lengo prouvençalo bonodi de grands escrivan, de mouvamen afeciouna e l’estacamen de prouvençau es estado mantengudo.

Pau re-escricho desempièi l’Age Mejan, li lengo d’o soun sujèto à de moudificacioun dins sa grafìo au cours de sa reneissènço. Lou felibrige e Frederi Mistral adouton uno grafìo, l’Abat Moustier (1831-1903) n’en prepausara uno reformo. Deja en Limousin, l’abat Roux (1834-1905) publico sa  » grammaire limousine  » e reprend la grafìo di troubadou.

Lou siècle vinten veira lis escolo e courrènt prendre d’espandido dins tout lou relarg di parla d’o. Vuei, dos grafìo coueïsiston dins la literaturo d’o, la grafìo dicho  » mistralenco  » qu’emplegan dins nòsti cous de lengo e la grafìo ispirado di troubadou e dis escri de l’Age Mejan emplegado pèr l’istitut d’estùdi óucitan. Lou prouvençau es uno lengo roumano coume lou francés. Se l’essenciau d’aquelo lengo nous vèn dóu latin, de terme e elemen gramaticau nous vènon tambèn dóu Grè mai tambèn, tras que seguramen de lengo d’óurigino pre-indouéuroupenco e celto-ligouriano parla pèr li terradouren avans la vengudo di pople mieterran au cours di siècle. Acò se vèi essencialamen dins li noum propre mai tambèn dins de mot d’usage. En Prouvènço, li noum de lìo i sufisse en  » asc  » ou  » osc  » coume Manosco soun de mot ligourian.
Lou prouvençau coumto quatre dialèite : Lou prouvençau roudanen es parla dins la valèio dóu Rose e en Camargo, es la lengo de Mistral e de si coumpan. Lou prouvençau maritime es parla à Marsiho, lou gavot parla dóu Luberoun e dis Aup de Nauto Prouvènço es lou di gènt de la mountagno. Lou Nissart es lou parla dóu païs de Niço. En Pichoto Camargo, parlan un prouvençau roudanen proun saupousca de bas-lengadoucian.

Laisser un commentaire

Vous devez être connecté pour publier un commentaire.

Catégories