Get Adobe Flash player

Litterature

La lengo d’O passara dins l’escri vers l’an Milo, parèis alor la literaturo d’O. Dins lou debana di siècle dougen e tregen, li troubadou canton l’amour courtés, mai fan tambèn passa de message pouëti e ideoulougi mourdènt dins uno pouësìo amirable

Poudèn cita quàuquis un di mai couneigu : Lou Du d’ Aquitano, Guilhem de Poitiers, Jaufre Rudel, lou limousin Bernat de Ventadour, Raimbaud d’Orange, Marcabrun, Pèire Vidal, Arnaud Daniel, Guiraud de Borneulh. En 1323, se foundo à Toulouso lou counsistori dóu gai sabé que devendra l’Acadèmi di Jo Flourau. Li meiour autour reçaupon de flour d’or o d’argent. Lou felibrige reprendra aquelo tradicioun.

Se la lengo d’o s’escafo dins li mitan literàri, d’autour countunion d’escriéure dins sa lengo meiralo mai soun pas recouneigu. Au siècle dès e seten la lengo se mantèn emé li Nouvè prouvençau que soun toujour canta à l’ouro d’aro, e, subretout li de Nicoulau Saboly (1614-1675). Fau pamens espera lou siècle dès-e-nouven pèr vèire uno vertadiero reneissènço.

En 1846 – 1847, Honnorat (1783 – 1852) publico un diciounàri prouvençau – francés en grafìo classico. Jaume Boé (1798 – 1864) ouriginàri d’Agen couneigu souto l’escais-noum de Jasmin triounfo en pouësìo dins tout lou sud de la Franço e tambèn à Paris. Frederi Mistral dira : « O Jansemin, nos as venjats ». Sis obro soun recampado souto lou titre « Los papillotos ». Vitour Gelu (1806 – 1885) un marsihés escriéu de « cansoun prouvençalo » que ié moustro li pichòti gens de Marsiho emé forço realisme. La reneissènço di lengo d’o au siècle dès-e-nouven s’apielo sus lou courrènt roumanti à la modo, d’efèt, dins li mitan literàri e artisti donon d’encensado pèr l’Antiqueta e l’Age Mejan. D’un autre las, l’interès pèr lou fouclore e li regioun soun dins lou biais dóu gouvèr de Louvis Philippe que vòu apara lou patrimòni e dreissa un enventàri naciounau. Dins li regioun, forço gens acampon, à mouloun, de doucumen etnougrafi que soun aro d’uno valour qu’a ges de pres pèr nòsti countempouran. Li fouclouriste dóu siècle dès-e-nouven an pouscu sesi à tèms lis us, cresènço e biais de viéure d’uno soucieta tradiciounalo que l’industrialisacioun e l’espandimen di mejan de coumunicacioun avien deja coundana. L’obro de Frederi Mistral es uno pèço majouro d’aquelo epoco. Buta pèr la voulounta de valourisa lou mounde prouvençau ounte vivié e, la lengo mai que tout, Mistral s’agrego de persouno qu’an li mémis idèio e la memo volounta.

En 1854, Jóuse Roumanille, Frederi Mistral, Teoudoro Aubanel, Jan Brunet, Alfounso Tavan, Ansèume Mathieu e Pau Giéra foundon lou Felibrige que perseguis sa toco vuei encaro. Frederi Mistral (1830 – 1914) es l’escrivan d’elèi de lengo d’o dóu siècle dès-e-nouven, sa renoumado s’espandis, bèn liuen, en foro di raro francesco.

En 1855, publicon « L’Armana prouvençau » que se perseguira. L’obro literàri majo de Mistral, « Mirèio » parèis en 1859 ; iè vaudra lou Prèmi Nobel de literaturo en 1904.  » Lou Tresor dou Felibrige » diciounàri prouvençau – francés e lou « muséon Arlaten », proumié muséon etnougrafi en Franço, founda en 1899, soun lou courounadis de soun obro.

Après aquelo generacioun mistralenco, veiren espeli uno segoundo generacioun emé Felis Gras (1844 – 1901) que publico « Li carbounié », « Toloza », un rouman « li Rouge dóu Miejour » e un recuei de conte « Li Papalino ». Batisto Bonnet (1844-1925) counto si souveni d’enfant paure dins « Vido d’enfant », es tambèn couneigu pèr « Varlet de mas » e « moun baile Anfos Daudet ».

Charles Rieu pouèto dóu Paradou, au pèd dis Aupiho, es mai couneigu souto lou pichot noum de « Charloun » (1846 – 1924). Es un ome de la terro, moudeste e soulitàri, que passo lou pau de tèms qu’a de libre à escriéure de cansoun sus d’èr poupulàri o à la modo de l’epoco. Si cansoun vendran tant poupulàri dins li balèti e li voto que passaran dins la tradicioun ouralo. Poudèn cita « la mazurka souto li pin ».

Valèri Bernard (1860-1936) escrivan, pintre, escultaire escriéu de rouman realiste sus lou pople de Marsiho : « Bagatóuni » « Lei Boumian ». Jule Boissière (1863 – 1897), Jan-Enri Fabre (1823-1915) entoumoulougisto, Anfos Daudet (1840-1897) Paul Arène (1843-1896) pouèto e autour de conte en francés.

La literaturo camarguenco pounchejo subran, à la debuto dóu siècle vinten emé dous autour de renoum, Lou Marqués Folcò de Baroncelli (1869 – 1943) e Jóuse d’Arbaud (1872 – 1950). Tóuti dous afeciouna pèr li grands espàci e la liberta, gardian, amourous de chivau e de biòu, van canta la Camargo gardiano e la vido fèro di palun. Henrieto Dibon dicho « Farfantello » cantara tambèn la Camargo, i’adura sa sensibleta de femo.

La pouètesso Marcelo Drutel, dins li piado d’Aubanel, publico en 1933 un recuei « Li Desiranço » qu’escalustro lis amo prudo de l’epoco. Jóuse Bourilly etnougrafe dóu Marrò es subretout couneigu pèr soun rouman »La Rèino Sabo ». Sully Andriéu Peyre (1890-1961) escrivan dóu Gard dereviho la pouësìo prouvençalo. Jouine, publico soun proumié pouèmo dins « l’Armana Prouvençau », bailejo la revisto mesadiero Marsyas mai de quaranto annado. Après la segoundo guerro moundialo, Louvis Baile, roumancié e pouèto pesco soun ispiracioun dins l’Oucéan Indian que i’a demoura quàuquis annado. Si « Conte de la mar e dis isclo » fan counèisse li païsage de Madagascar. Fau reteni tambèn l’obro noutablo de Carle Galtier, la di pouèto Fernand Moutet e Pèire Millet, Mas-Felipe Delavouët, óuriginàri de la Crau, autour dramati e pouèto. Mario Mauron es lou temouin de la vido pacano en Prouvènço e nous la fai reviéure sesoun pèr sesoun emé un biais calourènt.

La qualita dis obro publicado dins li trento darriéris annado dóu siècle vinten soun la provo de la vitalita de la lengo prouvençalo, que, quasimen despareigudo de la vido de tóuti li jour, n’en perseguis pamens soun evolucioun. Citaren : Jan-Pèire Tennevin « La vièio qu’èro mouarto », Andriéu Ariès autour de conte pèr enfant e de coumèdi, li pouèto Andriéu Resplandin, Sergi Bec, Enri Feraud. Lou roumancié Bernat Giely acaro si persounage prouvençau i guerro qu’an marca lou siècle vinten e à la rudesso de la vido mouderne e citadino. Miquèu Courty sensible à la naturo canto li bèuta de son païs. Aquel estùdi abeno pas lou sujèt, e de liuen. Dins lou debana de l’an, Pichoto Camargo presentara d’escrivan e cansounié, d’autre tèms o de vuei, ansin que de tros de sis obro. La drudesso de la lengo prouvençalo duerb la porto à l’espressioun de tèmo e genre de touto meno, mai uno memo lucho ligo aquélis autour, la, menado pèr la subre-vivènço d’un patrimòni culturau e linguisti que l’Istòri e la moudernita teinoulougico semblavon avé vouda à l’oublit. Lou siècle vinten a moustra lou countràri, lou siècle vint-e-unen perseguira soun pres-fa.

Laisser un commentaire

Vous devez être connecté pour publier un commentaire.

Catégories