Get Adobe Flash player

Li Danso

Li danso tradiciounalo nous vènon de la niue di tèms qu’èron l’espressioun dóu sacra, de l’apèu à l’envesible. Aquelo óurigino sacramentalo es souvènt oublidado, à l’ouro d’aro, soulet li dato e lis endré ramenton soun óurigino. Au travès de quàuquis eisèmple de danso que seguisson e que soun au repertòri de Pichoto Camargo, es un pau de l’istòri de la fèsto o pulèu de l’esperit festiéu de Prouvènço qu’anan retrouba.

 

Li Danso Ritualo

Aquéli danso an serva à bèl èime si formo ritualo, e, afourtisson uno visto mitoulougico di tradicioun.

Lei fielouso : Es uno danso de Caramentran pèr lis ome. Li dansaire travesti porton de fielouso e an la caro ennnegrido. Arlequin, uno fes encaro, meno la danso, au resson di cascavèu estaca i pougnet di dansaire.

Li courdello : Lou mai eisa es de counsidera que la danso di courdello es uno danso de mestié, la di courdelié. Li riban fan uno inmènso rodo, emblèmo soulàri. Li danso à l’entour d’uno bigo soun couneigudo dins mai que d’uno culturo. Ansin, la danso dóu soulèu encò de Sioux dóu Dakota que li dansaire se penjon i cordo de la bigo pèr de cro planta dins la peitrino e se bouton à vira à un trin d’infèr. La danso di courdello es pas tant espetaclouso mai d’uno valour simboulico tras que seguro. La bigo dóu centre es l’aisse dóu mounde jougnènt cèu e terro e mantenènt lou nivoulan coume lis aubre sacra couneigu d’en pertout dins lou mounde. Se danso à l’entour d’uno bigo coume à l’entour d’aquélis aubre en cantant, es l’óumage au Cousmos que l’ome n’en fai partido. La danso en round marco, belèu, lou ritme dóu mounde.

Li triho : Danso pèr imploura li Diéu, ié demanda uno recordo de la bono e li gramacia.

Bèn segur, l’evolucioun di soucieta a engensa de nouvèlli danso, asata li mai anciano e espandi sus de relarg mai vaste lis enracinamen geougrafi tradiciounau. La poulitico, li fèsto laïco, li biais de viéure soun vengu coumpleta ou moudifica li foundamen cultuau de la danso. Acò se vèi, subre-tout, pèr la farandoulo, vertadiero espressioun de la culturo contro-istairo dóu pople. A l’ouro d’aro, poudèn coumta tres merço de danso mai si raro soun pas eisado à fissa.

Li Danso « de Caratère »: Li mèstre e prevost de danso de l’armado eisercèron soun art fin qu’à 1870 e dins la marino fin qu’à la guerro de 1914. Ansin li jouvènt vengu de tóuti li classo de la soucieta proufichavon d’uno soulido fourmacioun de danso classico. Li diplomo de mèstre e prevost de danso èron decerni pèr uno jurado en seguido d’un eisamen sus la tengudo, li qualita d’invencioun e d’eisecucioun.
Tèste dis « Enfants d’Aramon »

En seguido de la demoubilisacioun de la guerro de 1870, li danso de caratère an penetra li vilo e vilage e de societa de danso n’en soun nascudo.

Li Danso « de Caratère »

La Gigo Lou pas Grè
La Gavoto Li Fiho de Maubre
La Farandoulo La Mateloto
L’Arlequino

Li Danso poupulàri : Serva pèr li group fouclouri, soun dansado pèr tóuti dins lis acampado poupulàri coume li balèti.
Soun dicho, danso poupulàri, tóuti li que soun pas de danso ritualo o de caratère.
Ansin, Lou group Pichoto Camargo danso :

– La fricassèio : dous calignaire se fougnon mai finisson pèr faire pache e dansa ensèn.

– Lou quadrille : es uno danso de saloun dóu siècle passa, quatre parèu de dansaire encadenon uno sequèlo de figuro.

Laisser un commentaire

Vous devez être connecté pour publier un commentaire.

Catégories