Get Adobe Flash player

Lou Coustume d’ome

Lou coustume dóu siècle dès-e-nouven, vuei devengu, coustume de tradicioun coumto dos tengudo : uno simplo, dicho,  » tengudo de païsan  » pèr tóuti li jour e uno tengudo mai aliscado pèr lou dimenche e li jour de fèsto.

Li formo chanjon gaire mai segound li sesoun, lou coustume sara de velout à costo o de lanage en ivèr e de telo o fin lanage coume l’alpaga en estiéu. Li coulour soun encro pèr li vèsto e li braio, aleva de l’estiéu, que li braio podon èstre claro mai jamai blanco. Soulet, li vèsti de ginnastico e li tengudo de razetaire soun blanco.

La vèsto negro, en velout à costo o lisc, coupo emé li braio listado de gris e blanc. Avèn de nouta qu’à l’epoco lou ple di braio èro pas marca. En ivèr, lis ome cargon un large mantèu de drap en mai de la vèsto.
Li braio soun tengudo à la centuro pèr uno taiolo de coulour bluio, roujo, negro o blanco. D’un biais generau, lou rouge èro reserva is aristoucrato mai tambèn i dansaire, à tóuti lis eisercice de ginnastico e i jo de plen èr coume lou tambourin en Lengadò. Lou blanc o lou rousset èro la coulour di païsan o dou pople. Lou negre èro la taiolo de dòu. La taiolo es uno larjo centuro de flanello, de sedo dins lou coustume bourgés o de telo bruno pèr lou coustume de travai. Mesuro sièis mètre de long. Encenturavo la taio e curbié l’estouma enjusqu’is anco. Mantenié li braio tout en aparant l’esquino.

Li camiso d’ome avien un panèu à l’arrié, penjant fin qu’à mié-cueisso, pèr èstre replega entre-cambo. Li mancho èro boufanto. Li païsan e oubrié di vilo pourtavon de camiso rousseto à la debuto, pièi de coulour, en estofo groussiero. La camiso blanco es la di bourgés e di jour de fèsto. Lis camiso en indiano, li famóusi cretouno prouvençalo soun cargado pèr li gardian. Es lou Marqués Folcò de Baroncelli qu’a arresta la tengudo di cavalié de Camargo, mai, li jour de fèsto o pèr li gràndis oucasioun cargon tambèn uno camiso blanco.

Desempièi lou siècle dès-e-vuechen, pièi dins lou debana di siècle dès-e-nouven e vinten, lou gilet èro pourta pèr lis ome de tóuti li coundicioun. Païsan e gènt de basso-man avien de gilet de velout à costo dins li coulour encro. Pèr li bourgés, li jour de fèsto èron de sedo o de velout brouca. La gravato es l’ournamen di bourgés e di jour de fèsto. Encò nostre es un riban de satin negre nousa, uno gravato lavalièro o encaro un riban de sedo large, de coulour, retengu pèr uno espingolo de gravato. Li gènt de basso-man ié preferisson lou foulard de cretouno nousa à l’entour dóu cou sus la camiso duberto.

Lou capèu es uno pèço dóu coustume qu’es necite de pourta. A la campagno, se porto lou capèu de paio e, aro, lou canoutié es lou capèu di bèu jour. Lou capèu lou mai coustumié es lou fèutre negre, marroun o gris dis alo envasado. Pèr li gardian e lis ome de Pichoto Camargo es lou  » Valergue  » o  » capèu de Lunèu  » o encaro lou pichot capèu round dóu Queila, lou  » frivole « . Meme l’estiéu lis ome se desseparon jamai dóu capèu, es d’usage de se descurbi, unicamen, à la glèiso e pèr lis entarramen.

Pau d’ome avien de beloio, pamens, la mostro à pouchoun e la giletiero èron d’usage. Li mai riche èron en or o argènt, li mai paure en acié o en ferre.

Li ciéutadin pourtavon de soulié negre emé de courdello. Sus lou relarg coustié, li gens dóu pople pourtavon un esclop proun fin, mai forço, preferissien, l’estiéu, la sandalo de cordo e telo.

Lou coustume de gardian es escassamen lou de la Camargo o de la Pichoto Camargo. Asata à la vido à chivau, es arresta à la debuto dóu siècle vinten pèr lou Marqués Folcò de Baroncelli. Soun li tradiciounàli braio claro en  » pèu de darboun « , la camiso en cretouno prouvençalo, la centuro de cren trena e lou parèu de boto roubusto. Li gardian cargon uno vèsto negro en velout lisc, gansa de negre. La cravato es de fes un simple foulard de cretouno d’àutri-fes uno courdello o uno lavalièro. Lis ome de Baroncelli an jamai de gilet, l’usage es demoura à la  » Nacioun Gardiano « . Lou vèsti tradiciounau prouvençau se vèi plus gaire, que dins li fèsto e li ceremounié dis assouciacion de mantenènço di tradicioun, mai, lou coustume de gardian es lou vèsti de travai dis ome de bouvino.

Laisser un commentaire

Vous devez être connecté pour publier un commentaire.

Catégories